| |
كاتب الموضوع | رسالة |
---|
| تاريخ كتابة المُساهمة السبت فبراير 12, 2011 5:35 pm | |
| الخرتيـت
الخرتيـت
( 1 )
تلاتين سنة
و شعب مصر ف مَحزنة
اللي انطوَى و اللي انزَوَى و اللي انحَنَى
و اللي انكوَى و اللي انشوَى و اللي انتـنَى
و اللي انطحَن في المطحنة
في ظِل عهدك ياللي سافِك دمّنا
زعيم حكيم في المَسْكَنة
مُتأنِي لما تحِشنا
مُتَدَنِي لما تدُقِنا
يا سم جاري ف هَمِّنا
يا هَم سارِق حِلمِنا
نشفت عيشة أهلنا
حنطتِنا و جففتِنا
ضيّقتِنا و وَسَّعتِنا
وطواط و ظاط في دَمّنا
ماصِصْ عِضامنا و لحمِنا
خاين لعيشنا و مَلحِنا
هُوَّ انت إيه .. موصوف لنا ؟!
هو انتصاب على حِلمنا ؟!
تلاتين سنة ..
و الشعب عايش مَعجَنة
و انتَ بتاكل أكلِنا
و تحَلّي بينا كلنا
و تقول مافيش
و مقضيينها لقمة حاف
علشان نعيش
حتى اللي " ضَرِّيب " ..
مِشتهي سجارِة حَشيش
خرتيت غَتيت
قَرنك و طايح في البشر
خازوق و في الناس اتحشر
وباء على الأرض انتشر
و نقول : يادي الحظ الدّكر
لو عزرائيل كان يفتكر !
لو كان يغور !
يمكِن نخضر أرض بــُـور
أو تتولد م الظلمة نور
واقعين في بير .. غويط مَرير
و الإحباطات .. واقفة احتياط
الضهر كَلّ من السِياط
و القهر فيه ريحة شِياط
و جيوبنا صَبَحِت ع البلاط
إبليس و سايـِق في العُباط
و احنا اللي عايشينها انضِباط
شادِّين حِزامنا للبَطاط
مانعين ألمنا مِ العِياط
تلاتين سنة
و المَحزنة ورا كل باب
وطن و عايش في اغتراب
مغروز في لحم ضميرُه ناب
شباب و شَعر دماغُه شاب
نكونشي عايشين عصر غاب ؟!
و بنات بتستنى الحلال
و ابن الحلال أبو بخت مال
عاطل و مش لاقي اللضا
مستقبله ف عهدَك مَضَى
داعيين عليك مَلوّ الفَضا
و انتَ لا صوت بيسمّعَك ..
و لا صَدَى
تلاتين سنة
و انتَ بتحقِن دمّنا مورفِين عهود
تلاتين سنة
لمّــا الأماني عفّنِت ..
و أَكَلها دود
و احنا الحشود ..
نفطر و نتعشى وعود
كلام و لابس ريش نعام
خُطَب كاتِبها دَيُوث هُمام
و حكومة تغسل مُخِنا
و تقول لنا : كله تمام
و مصر ماشية للأمام
خليت عيشتنا في انفصام
شلّيت أملنا بالانهزام
و عام يعدّي ف ضهر عام
و لسّة شدِّين الحِزام
و الشعب لا طايل حلال
و لا حرام
|
|
| |
| تاريخ كتابة المُساهمة السبت فبراير 12, 2011 5:36 pm | |
| الخرتيـت2
( 2 )
و نشتكي
نِلقى الردود مِتحضّرة
و الدنيا جنة مزهّرة
و مصر صاعدة في اتجاه المُشترَىَ
إعلام و ماسِك سنفرة
و مخللي قُدّامنا وَرا
يا نظام و آخر مسخرة
ليه تاكلوا مال سِيدنا النبي
و الشعب ليه ياكُل ( ... ـرَة )
العُهر دستور حاشيتك
يهللوا في محبتك
و يدقوا في الهُون كفتِتك
و يبوسوا طراطيف جزمتك
يا محلا دقة خطوتك
في طلعتك و دَخلِتك
بنستجير بربنا
يحرِمنا طلعِة حضرتك
يعفينا من غول سحنتك
و نْقِيم فَرَح يوم خَرجِتك
يا لحّاسين جزمة رئيسنا المحترم
يا حزب بيربي ف عُرَم
يا مشبهينُه بالهرم
الدور عليكم تستلقوا وعدكوا
بضرب الصُّرَم
و اجدع ما فيكم ينشَرَم
كاوتش ريِّسكو اتخرم
و الأوكسوجين محتاج سنين
علشان يزيل ريحة الفساد
ريحة فساد مالية البلاد
غلبت ريحتها ثمود و عاد
تلاتين سنة تزوير و غِش
و نظام مركّب ألف وِش
و ف وسطِنا عَمّال يحِش
الصبح نتصبّر بِفول
و مِسانا نتصبر ب " مِش "
ناس في القصور مِتبغددة
و احنا ف حياة .. كِدة و كِدة
سايق عليك السيدة ،،
تسيب رقاب الشعب ده
سيب المدى يحضن طيور
سيب الخطاوي تعدّي سور
سيب الأمل يطرح زهور
يا حابس النور في الجحور
تلاتين سنة
و احنا ف صدارة كل هَمّ
اللي اتعبط و اللي اتشفط و اللي ادْلَهَمّ
و اللي انبَطَح و اللي شَطَح و اللي اندَهَمّ
و اللي انتحَر و اللي اتنَحَر و اللي اتهَدَم
و اللي اتنَسَف و اللي اتخَسَف ..
قضاها شَمّ
و انتَ "البـِعِيد" أعمى و أصمّ
و لا عند أهلك أىّ دَمْ
تلاتين سنة .. و المِليارات
في بنوك سويسرا و لُندرة مِتسَتِّفة
و حقوقنا فوق رف الزمن متكتفة
خليت حياتنا مؤسِفة
و لا عُمر كِرشَك مِ الطَّمَع قال يا كِفَى
تلاتين سنة
و الضرب نازل على القفا
تضحك لصوت الطرقعة
و تقول : يا شعبي بالشِفا
نايمة البيوت على بَطنَها
جعانة تحمد ربها
بردانة تحمد ربّها
حابسة ضميرها ف سِرّها
ماسكة في آخر صبرها
شايفة بعيونها أرضها
مِتباعة بتراب الفلوس
متعوس يا شعب بيحكمُه
شِلة جاموس
خراتيت على الجعانين تِدُوس
و نفوس بتاكل في النفوس
و كل بيت عايش كابوس
يا مصبّر الناس عَ " اللِّبُوس "
إحنا اتهَرينا يا مَرْيَسَة
مِ الهمبكة و المحلسة
و المصري صار بين الشعوب
هُزُأ و آخر مألسة
إحنا اتهرينا يا مَريَسَة
أعلام شموخنا مُنَكَّسة
دواليب همومنا مُكدّسة
و عيونَّـا ناضحة بالأسَى
و نقول عَسَى
تغور في صُبح .. أو مِسا
يا بو جـِتة باردة منحّسّة
|
|
| |
| تاريخ كتابة المُساهمة السبت فبراير 12, 2011 5:37 pm | |
| الخرتيـت3
( 3 )
تلاتين سنة يا مُستَبِد
في مجدنا عمّال تِهِدّ
و ف نِيلنا بمؤامرة تِسِد
نرخي اللجام و انتَ تِشِد
نشكي الآلام و انتَ تِمِد
طاب هات و خُد !
إسمَع و رُدّ !
إهجِم و صُدّ !
حِس بشعورنا يا أَبَدّ
مانتاش مُخلّد للأبد
هو ّ أنتَ إيه ؟! ..
إله بنتوسّل إليه ؟!
مقام بنتمسّح عليه ؟!
غزال بنتملَّى ف عينيه ؟!
هو انت مين ؟! ..
كاهن وراه بنقول آمين ؟!
حضرة أمير المؤمنين !
ما تغور بَـأَة
و ارحمنا من دي المحرقة
هولوكوست طغيانك نَضَح
مفضوح و لسة هاتـتفضح
سيب الأماني تنطلق من الشرنقة
و عن رِقاب الخَلق فُك المشنقة
ما تغور بأة و بطّل نطاعة
كِفاياك يا سايق في الصِياعة
الضهر مال في خضوع و طاعة
و العيشة في غاية الوضاعة
إرحَل بأة
خللي الأماني مُستطاعة
إحنا انفطمنا مِ الرِضاعة
و الظلم ساعة
مش تِلت قرن من البشاعة
ياللي رامينا ف بطن جُبّ
حاطط لبكرة ميت مَطَب
ضرب البُلَغ فيك مُستحَبّ
الشعب قام و الحق هَبّ
ضربنا كرسي في الكلوب
و كلنا بنقول يا رب
يطلع علينا الصُبح
نِلقى العِجل طَبّ
بص ف كفوفَك
تِلقى دَم الورد سايل
بص ف صفوفك
تِلقى عرش ، عَموده مايل
و فوق رفوفَك
ذكريات عهد الهوايـِل
قوم ودّع الكرسي اللي زايل ،،
قوم ودّع الكرسي اللي زايل ،،
|
|
| |
| |
| |
| تاريخ كتابة المُساهمة السبت فبراير 12, 2011 9:06 pm | |
| رد: الخرتيـت
تسلم
يا دكتور اسلام علي القصيدة الجميلة
للشاعر الكبير الأستاذ كمال عبد الرحمن
ياريت تحط المشاركات الثلاثة
في موضوع واحد
تسلم الآيادي
|
|
| |
| |
| |
| تاريخ كتابة المُساهمة السبت فبراير 12, 2011 11:31 pm | |
| رد: الخرتيـت
ربنا يهديكم
|
|
| |
| |
| |
| تاريخ كتابة المُساهمة الأحد فبراير 13, 2011 3:40 am | |
| رد: الخرتيـت
يا مشبهينُه بالهرم
الدور عليكم تستلقوا وعدكوا
بضرب الصُّرَم
و اجدع ما فيكم ينشَرَم
كاوتش ريِّسكو اتخرم
|
|
| |
| |
| |
| تاريخ كتابة المُساهمة الأحد فبراير 20, 2011 1:02 am | |
| رد: الخرتيـت
حقا جزاكِ الله خيرا وبارك اللة فيكِ قصيدة جميلة
|
|
| |
| تاريخ كتابة المُساهمة الأربعاء مارس 02, 2011 5:12 pm | |
| رد: الخرتيـت
شكرا لمرورك
|
|
| |
| تاريخ كتابة المُساهمة الثلاثاء مارس 13, 2012 8:29 pm | |
| رد: الخرتيـت
|
|
| |
| |
| |
| |
| |
|