| تاريخ كتابة المُساهمة الأربعاء يوليو 06, 2011 8:18 am | |
| زمارة الخطر
فاكر..
زمارة الخطر
وطفى النور
وقدام كل بيت ساتر...
فاكر..
ايام السهر
والامتحانات
وكوباية الشاى من ايد امك
وانت بتذاكر..
كنت بتفرح لما تنجح
او حد يقول عليك
شاطر..
فاكر الامان
ننام وفاتحين البيبان
دلوقتى فى كل شارع لجنه
وفى كل بيت عساكر..
مين اللى قال
البحر غادر..
مين اللى قال انك خلاص
تعبان
ومش قادر..
ومين العبقرى
اللى سماك
شحات وعريان وصابر..
هو احنا توهنا من بعض
هو احنا ليه ماشيين
وباصين فى الارض
هو احنا لسه بنحلم
وبنحاول
وبنعافر..
سؤال لاكان ع البال
ولا ع الخاطر.
اسأل عليك يقولوا نايم!
وتسأل عليه يقولولك سافر!
دلوقتى فى كل ثانيه
بنسمع الزماره
وبدال الغاره الف غاره
لكن لابيصحى شارع ولاحاره..
وكل واحد فينا محتاج مليون
أماره
علشان يحس بالخطر
ياســاتر..
|
|
| |
| |