" أنا محجبة ليه ؟ "

أنا محجبة - بعد إيماني بأمر ربنا إن الحجاب فرض على كل مسلمة - علشان الأسباب التالية:

1 -

عشان
انا حرة … مش من حق حد يشوف مني اللي مش عايزاه يشوفو إلا بإرادتي … ومن
حقي اختار مين اللي يشوف مني أجمل ما عندي .. واللي يشوف دا ويكون حقو
وحلالو بلالو عن طيب خاطر.. لازم هوا كمان يديني مشاعرو واللي باقي من عمرو
عن طيب خاطر…

2 -

عشان
أنا غالية .. ماينفعش أقلل من قيمة نفسي واخليها عرضة لكل العيون .. ويبقى
خروجي وانا كاشفه ضوء أخضر لكل من هب ودب يسرق مني ولو نظرة لأي جزء مش
متغطي مني .. حتى لو ما كانش دا قصدي … بس مش حاقدر امنعو… (كامل اعتذاري
لغير المحجبات.. ولكن ده اللي حيوصل منك لضعيفي النفوس حتى لو ماكانش دا
قصدك.. ودا اللي عشانو ربنا فرض الحجاب . عشان مايطمعش اللي في قلبو مرض) …
مع الأخذ في الاعتبار انو “كل من هب ودب دا” مش بس الشباب اللي بيعاكسو
البنات في الشارع .. دا يتضمن حتى الزبّال الله يكرمنا ويكرمو .. كل دول من
الممكن انهم يشوفوكي … لا وكمان يمكن مااتعجبيهمش ويدوروا وشهم

3 -

عشان
أنا باحترم نفسي .. وشايفة نفسي كبيرة وليها قدرها .. وماينفعش أنزل سوق
المنافسة في الأنوثة عشان أفوز في الآخر بنظرة شهوانية أو كلمة غزل رخيصة
أو عرض صحوبية…

4 -

عشان
انا جمالي مش خارجي وبس.. ومن حقي ان اللي ييجي يتزوجني .. واللي حاديه
الباقي من عمري .. وكل مشاعري .. وحقاسمو أحلامي وأفكاري .. وحخلف منو
اولادي .. .. مايختارنيش على مقاييس شكليه وبس .. أو يكون هوا دا العامل
الأساسي في اختياره ليا … عشان كده مش ضروري يشوفني في كامل زينتي وجمالي
قبل ما يتزوجني . . الأهم انه يحب روحي ويعجب بشخصيتي .. ويرتاح معايا
نفسياً.. ( في بنات بتأجل الحجاب لحد ما تتزوج.. على أساس انها تكون شبكت
واحد وضمنتو .. مع إنو مافيش حاجه مضمونه في الزمن دا .. واللي اختارها
عشان جمالها .. ممكن بالرااااحه يتزوج عليها وحده أجمل منها.. لأنو أكيد في
الأجمل منها يعني) ""..

5 -

عشان
أنا بخاف على أخويا في الله اللي بيشوفني في الشغل أو في المواصلات أو في
الشارع .. ويمكن يكون عايز يتقرب من ربنا .. وبيجاهد نفسو عشان يغض بصرو..
فما ارضاش لنفسي اني اكون سبب في اني افتنو..

6 -

علشان
أنا بشيل هم أخويا في الله اللي نفسه يتزوج ومش قادر لضعف إمكانياتو
الماديه .. فمش ضروري يعني ازود عليه همومو… وأخآآيلو في الرايحة والجاية
..

7 -

دا
غير حاجه مهمه كمان … الكفن بتاع النساء.. فيه حجاب .. فاللي مش هتلبسو
وهي حيه بإرادتها طاعه الله.. حتلبسو كدا كدا وهي رايحه لقبرها.. وطالما
ربنا بيقول اننا نتستر حتى واحنا رايحين قبورنا وخلاص انتهى التكليف …
ومحدش حيشوفنا تاني ولا احد حيطمع فينا .. يعني مالهاش معنى اننا نمشي
كاشفيين شعورنا لكل العيون واحنا أحياء نرزق.. يبقى الأولى اني اطيع ربنا
بإرادتي وأقابلو وهو راضي عني واخد أجري كامل.. ولاّ اني ماالبسوش غير وانا
جثه واقابل ربنا وهو غضبان عليا؟

والأسباب اللي فوق دي ..
هيا اللي فهمتني ليه ربنا فرض علينا الحجاب.. مش تعسير ولا تضييق .. الحجاب
فعلا عزة وكرامة.. مايعرفهاش غير اللي داق طعم الستر..

ربنا يهدينا ويهدي بنات المسلمين